Vo Phir Mujhe Yaad Aane lage hai

vahii phir mujhe yaad aane lage hain
jinhen bhulaane mein  zamaane lage hain

vo hain paas aur yaad aane lage hain
muhabbat ke hosh ab Thikaane lage hain

sunaa hai hamen vo bhulaane lage hain
to kyaa ham unhen yaad aane lage hain

haTaaye the jo raaste se doston kii
vo patthar mere ghar mein aane lage hain

ye kahanaa thaa un se muhabbat hai mujhako
ye kahane mein mujh ko zamaane lage hain

qayaamat yaqiinan qariib aa rahii hai
'Khumar' ab to masjid mein jaane lage hain

Kumar Barabankavi